ПРЫРОДНА-ЛАНДШАФТНЫ КОД МІФАПАЭТЫЧНАГА МЫСЛЕННЯ ЯК АБ’ЕКТ МІЖДЫСЦЫПЛІНАРНАГА ДАСЛЕДАВАННЯ
Abstract
У артыкуле на падставе разнастайных навуковых крыніц аналізуецца працэс даследавання айчыннымі і замежнымі навукоўцамі прыродна-ландшафтнага кода. У сусветнай гуманітарнай навуцы рэалізаваны міждысцыплінарны падыход да вывучэння прыродна-ландшафтнага кода, які ў сваю чаргу трактуецца як чыннік культурнага кода; у самім прыродным ландшафце вызначаецца вобразна-сімвалічны элемент. У працах этналагічнай скіраванасці прыродна-ландшафтныя аб'екты разгледжаны як канкрэтна-рэчавыя рэаліі, якія актыўна семіятызуюцца міфапаэтычным мысленнем; у работах, дзе пераважае філалагічны аспект над гістарычным, прыродна-ландшафтныя сімвалы трактуюцца як паэтычныя вобразы і матывы. Сучасны стан гуманітарыстыкі ў сферы даследавання семіятызацыі прыродна-ландшафтных аб’ектаў міфалагічным мысленнем, вызначэння іх традыцыйнай сімволікі характарызуецца дастаткова прэзентатыўнай базай назапашанага фактычнага матэрыялу, даволі высокім узроўнем яго першаснай апрацоўкі ў межах канкрэтных этнічных традыцый. Нягледзячы на тое, што прыродна-ландшафтны код з’яўляецца адным з вызначальных чыннікаў міфапаэтычнай мадэлі свету беларусаў, пакуль што адсутнічае яго спецыяльнае даследаванне.