МОЛАДЗЬ У СЕЛЬСКАГАСПАДАРЧАЙ ВЫТВОРЧАСЦІ БССР У 1930-я гг.

Abstract

Артыкул прысвечаны даследаванню праблемы ўдзелу моладзі ў сельскагаспадарчай вытворчасці Савецкай Беларусі ў 30-я гг. ХХ ст. Сцвярджаецца, што юнацтва з’яўлялася важнай апорай у развіцці сельскагаспадарчай вытворчасці БССР, непасрэдна ўдзельнічала ў мадэрнізацыі сельскай гаспадаркі рэспублікі. Разам з тым у пачатку 1930-х гг. пашырэнне адмоўнага стаўлення ў грамадстве да палітыкі калектывізацыі знайшло адлюстраванне і ў камсамоле БССР. Агульны яго ўдзел у калектывізацыі і арганізацыйна-гаспадарчым умацаванні калгасаў лічыўся нездавальняючым. Значная колькасць камсамольскіх арганізацый абмяжоўвалася правядзеннем толькі агракультурных мерапрыемстваў. Аднак, нягледзячы на ўсе цяжкасці і складанасці, уплыў камсамола ў калгасах, саўгасах, машынна-трактарных станцыях і майстэрнях рэспублікі паступова пашыраўся, дзякуючы мэтанакіраванай палітыцы ўлад. Новай формай удзелу юнакоў і дзяўчат ва ўдасканаленні сельскагаспадарчай вытворчасці стала арганізацыя па ініцыятыве камсамола рэспублікі пры яго камітэтах маладзёжных сельскагаспадарчых станцый. Але і напрыканцы 1930-х гг. сялянская моладзь БССР не была цалкам ахоплена калгасамі. У рэспубліцы нават меліся гаспадаркі маладых сялян-аднаасобнікаў.